晌好耐好耐之前...雞蛋覺得通常Happy Ending o既童話故事都係由「晌好耐好耐之前」作開頭。所以，晌好耐好耐之前，當時位於現今南極大陸仲未被冰封，同今日o既南極大相徑庭，唔單止綠茵處處、鳥語花香，仲住左一大班人。生活環境與及文明程度大致同今日o既香港相若。唯一唔同o既係當地居民o既職業非常特別 -- 大部份o既當地居民都係尋寶人。

      當地居民大部份都係尋寶人o既原故，乃係因為當地充滿住不同o既礦 -- 金礦、銀礦、銅礦、鐵礦、鑽礦、油礦、煤礦等等數之不盡。只要尋寶人一發現未有主人o既礦，立刻可以據為己有。開採後銷售出國o既利潤真係唔講得笑，閒閒地夠食十代八代。所以大部份人除左日常工作，工餘時間都衝左去尋寶。

　　之所以只係「大部份人」係尋寶人，而「小部份人」唔係，原因乃尋寶並非一門No Cost o既工作。梗係，天下間除左童話故事入面o既情節，邊處有咁荀o既o野?? 尋寶o既Cost非常之大。除左要投資一定金錢準備尋寶工具，仲要有付出無限身心精力o既覺悟，始終體力勞動o既o野唔係「he哦瑕hei圍威喂」。而且尋寶呢家o野，並唔係你話好努力去尋就尋到。尋寶尋寶，尋極都尋唔到，好似便秘o既人坐晌屎塔上面日日就係咁o諗：幾時有呀? o個種精神上o既煎熬真係非常人能承受。又或者係尋寶尋到，一心o諗住終於到自己做大富翁，點知原來好似挖鼻屎咁挖幾分鐘就挖晒，o個種這麼近那麼遠o既感覺試問你點頂??

      阿強就正正經歷過所有一切尋寶帶o黎o既無盡痛苦。不過佢俾一般人黑 -- 唔知係改錯名定係時辰八字同該地相沖，阿強挖下一個，挖下又一個...點知個個都係挖兩Round就油盡燈枯Game Over. 遇到呢D情況，賭性強o既人會繼續不屈不撓繼續尋寶。但係阿強並非人如其名，反而佢o既心靈就非常之脆弱。佢覺得假如自己再中空寶都應該脫唔出痴線o既命運。為自己o既健康著想，阿強決定退出呢個尋寶界，乖乖地打份朝7晚11 o既牛工算數。

　　屈指一算，阿強退隱江湖已經有數年時間。呢幾年阿強身邊越o黎越多朋友因為發掘到不同o既礦而發大達。一次、兩次，阿強都當故事聽，替中寶o既朋友感到高興。但係四次、五次甚至係十次、廿次相同o既發達故事，漸漸令阿強興起重操故業o既念頭。一日，阿強養精蓄銳，摘好個吉日良時，正式重出江湖。野心勃勃o既阿強憑藉一股雄心滿天下o既火，不辭勞苦、不分晝夜、不知寢食、不假思索、不厭其繁、不遺餘力咁開山劈石，終於，俾阿強o既劈出一個煤礦。

      阿強非常開心。原因係阿強請過數個分析師推算煤礦o既藏量，以地形、位置、石質同媒o既質量o黎推算，所有分析師都一致認為個煤礦原來仲連接住山o既另一面，以山勢分析相信連綿數千萬里，所以就算掘唔到1000年都至少掘到500年。阿強心o諗：今次仲唔係搞掂，食碗麵？點知就係搞唔掂~!就係入晒都有交嗌~!!話說阿強晌東面山頭發現呢個煤礦，挖左3個月之後發現無媒出喇喎，咁佢就攀山越嶺睇睇山o既另一面究竟係咩狀況啦。點知就俾佢發現原來西面隔離村張氏早晌10代以前已經挖緊...無煤出o既原因係足夠採1000年o既煤量已經俾張氏家族開採左999年零9個月喇...

      阿強呆呆咁獨自坐晌個山上面，暮然回首...原來佢晌呢個尋寶界入面只不過係追逐緊一個不切實際o既夢以及重覆掘、掘、掘呢個動作。所得到o既一切一切除左係沙泥之外，就只有自己o既血...彷似每一下插、挖、轉、勾除左向住堅硬o既山石，其實同時都係向住自己脆弱o既心靈...好痛...簡直痛不欲生...

雞蛋